Historia del concejo

Historia

Historia del conceyu de L.lena

La presencia del home nel territoriu de L.lena constátase dende'l neolíticu, tal y como amuesen los yacimientos mineros de Rospaso y la necrópolis megalítica de L'Alto La Cobertoria. L'estratéxicu asitiamientu xeográficu del conceyu de L.lena como "Puerta d'Asturies" marcó'l trescurrir históricu del territoriu.



La Vía Romana de La Carisa, formando parte del camín de la Ruta de la Plata, pue tomase como primer episodiu d'esta secuencia histórica, siendo esti camín, posiblemente d'orixe prerromano, una de les víes de penetración de les lexones romanes n'Asturies, que llegaron incluso a establecer un campamentu nel denomináu Castiil.lu de La Carisa. Niciu tamién de la ocupación romana ye la villa de Mamorana a la que pertenez un interesante mosaicu, datáu n'época baxoimperial (sieglos IV y V), hoi custodiáu nel Muséu Arqueolóxicu d'Asturies.

La monarquía asturiana tamién dexó la so buelga nel conceyu cola ilesia prerrománica de Santa Cristina de L.lena, declarada Padremuñu de la Humanidá en 1985, llevantada a mediaos del sieglu IX dientro del periodu ramirense del arte asturianu. Sícasí, a pesar de contar con tal ilustre testigu de la historia pocos son los datos conocíos sobre l'alta Edá Media nel conceyu sacante la esistencia de centros monásticos pequeños y l'articulación del espaciu en dos territorios definíos pelos valles del Payares y el Güerna. Yá nel sieglu XII asistimos a la consolidación de les estructures feudales cola formación de los grandes dominios del monasteriu de Santa María d'Árbás y la Ilesia d'Uvieo, que van contar con estratéxiques heredaes na zona, como los cotos de Payares y Campumanes bien importantes pal tráficu comercial. Precisamente ye nesti momentu cuando nuevamente la naturaleza de sitiu de pasu del conceyu de L.lena vuelve a ponese de manifiestu al atravesalu pel ramal del Camín de Santiago que dende Lleón llevaba a Uvieo pel puertu de Payares pa responder al dichu popular que diz "quien va a Santiago y non al Salvador visita al criáu y dexa al Señor". Una vía de comunicación que facilitaba non solo'l pasu de pelegrinos, pa los que se construyeron albergues y hospitales, sinón tamién de comerciantes y mercancíes dende la costa asturiana a la Meseta.

En 1266 el rei Alfonso X el Sabio dientro de la so política de repoblación otorga la Carta Fundacional de la Puebla / La Pola col fin d'establecer na zona un centru económicu y alministrativu organizador del poblamientu rural de la zona. La nueva "Pola" dotóse entós d'un abondoso arrabalde nel que s'integraron dellos territorios qu'incluía los actuales términos de los conceyos de L.lena y Mieres, polo que se conoció como El Conceyón, concediéronse-y los privilexos del Fueru de Benavente y favoreciósela cola instauración d'un mercáu selmanal.

Dende la fundación de La Puebla y l'arrabalde les tensiones ente'l poder conceyil y los dominios señoriales de la Mitra (el cotu de Payares y Campumanes) fueron constantes dada la situación estratéxica d'estos llugares nes rutes comerciales y la riqueza de les viesques y pastos. Los conflictos ente dambes instituciones allargáronse hasta mediaos del sieglu XVIII cuando finalmente producióse la unificación alministrativa axuntando los territorios de les xurisdicciones eclesiástiques al conceyu de L.lena qu'algamó entós el so mayor desenrollu. Foi precisamente a finales d'esta mesma centuria cuando, col respaldu de Xovellanos y Campomanes, el puertu de Payares s'escoyó como principal pasu de la cordillera Cantábrica nes comunicaciones cola Meseta, dando empiece les obres de la carretera nel 1771, magar nun s'acabare hasta sesenta años depués, nel 1834.

Los sieglos XVIII y XIX fueron tiempos d'axitación y cambios. En 1809 les tropes napoleóniques entraron n'Asturies pel puertu de Payares, llegando a la capital del conceyu onde se dieron disturbios violentos. En 1836 pola Real Orde de 14 d'abril El Conceyón llega al so fin cola creación del conceyu de Mieres escindíu del de L.lena, qu'algamó nesi intre la configuración territorial que caltién na actualidá. Esta segregación, llevada alantre non ensin rocees, llevó a una notable tresformación pa La Pola, que vio menguaes les funciones alministratives centralizadores a favor de la villa de Mieres que cada vez tenía más fuerza. El desenrollu y la industrialización llegaron entós al conceyu tresformando les, hasta entós, formes de vida tradicionales, eminentemente agrícoles y ganaderes. La siderurxa, la minería y la inauguración del ferrocarril pel puertu de Payares, una de les llinies más problemátiques d'España, truxeron al conceyu aires nuevos de progresu y les idees del movimientu obreru.

La Revolución del 34 y la Guerra Civil tuvieron otra vuelta nel conceyu de L.lena ún de los principales escenarios dientro nel panorama asturianu. El puertu de Payares, de gran importancia estratéxica, fizóse bien llueu como oxetivu primordial de les fuerces nacionales, sicasí, la mayor parte del conceyu de L.lena, enmarcáu na zona lleal a la República, nun pasó a manes nacionales hasta otubre de 1937. Acabada la Guerra Civil l'actividá minera convirtióse en motor de la economía del conceyu, siempre apoyada pola ganadería y agricultura de subsistencia, hasta que la crisis del sector nos años 70 relegáronla a una actividá residual.Actualmente les comunicaciones, la industria y el sector servicios ocupen a la mayoría de los sos habitantes, ensin dexar de llau sectores tradicionales como la ganadería.